Në Vlorë, qyteti ku u ngrit për herë të parë flamurit i Shqipërisë më 28 Nëntor 1912, është zhvilluar ceremonia e ngritjes së flamurit shqiptar 110 vite më pas. Të pranishëm në këtë ceremoni ishin krerët më të lartë të shtetit Shqiptar dhe të Kosovës.
Presidenti i Shqipërisë Bajram Begaj dhe presidentja e Kosovës Vjosa Osmani, dy kryeministrat Edi Rama dhe Albin Kurti, kryeparlamentarët Lindita Nikolla dhe Glauk Konjufca si dhe kryetari i Bashkisë së Vlorës, Dritan Leli kanë nderuar ceremoninë e ngritjes së flamurit.
Kryeministri Edi Rama, vendosi një kurorë me lule me u përkul me respekt pranë monumentit simbol të përpjekjeve dhe sakrificave të patriotëve shqiptarë për pavarësi, ku zhvilluan homazhe dhe vendosën kurora me lule edhe krerët e lartë të shtetit në Shqipëri e Kosovë, drejtues të pushtetit vendor, si dhe qindra qytetarë të Vlorës dhe jo vetëm.
Fjalën përshëndetëse në këtë ditë të shënuar për shqiptarët e mbajti presidenti i Shqipërisë Bajram Begaj, i cili tha se sot shqiptarët kanë vënë dinjitetin e tyre në botë dhe se Shqipëria është partnere e besuar dhe aleate e SHBA, BE dhe Mbretërisë së Bashkuar.
Begaj tha se është detyrë e Shqipërisë të mbështesë fuqizimin e faktorit shqiptar kudo që ata jetojnë.
“Shqipëria është anëtare e denjë e NATO-s, është partnere e besuar dhe aleate e SHBA, BE dhe Mbretërisë së Bashkuar dhe shumë vendeve të tjera mike në botë. Ndërsa para 110 vite diskutohej copëtimi i trevave shqiptare, sot Shqipëria luan një rol të rëndësishëm në ruajtjen e paqes. Samiti i 6 dhjetorit është një mesazh mbështetje për shqiptarë dhe një arritje për të gjithë rajonin. Historia jonë na vjen si amanet, askund më mirë se në Vlorën e Flamurit nuk mund të marrë më mirë mesazhi për përmirësimin e të gjithëve dhe sidomos të klasës politike dhe demokratizimin e institucioneve. Shqipëria ka detyrë të mbështesë fuqizimin e faktorit shqiptar kudo që ata jetojnë në përmbushje të detyrimeve kushtetuese e kombëtare. Patriotët që nderojmë sot janë shembulli më i mirë për t’u bashkuar për interesat kombëtare”, tha Begaj.
/rtsh.al/
