Shtetet e Bashkuara të Amerikës kanë bërë të ditur se propozimi për një armëpushim 21-ditor midis Izraelit dhe Hezbollahut ishte "koordinuar" me Tel Avivin, por më pas është refuzuar nga kryeministri izraelit Benjamin Netanjahu.
Më herët sot, zyra e Netanjahut bëri të ditur se kryeministri nuk i ishte përgjigjur propozimit të armëpushimit të mbrëmshëm, të hartuar në OKB nga një bllok aleatësh prej 12 anëtarësh.
Pavarësisht kësaj, sekretarja e shtypit e Shtëpisë së Bardhë Karine Jean-Pierre tha se propozimi "ishte i koordinuar me palën izraelite".
Në një konferencë shtypi në Uashington, Jean-Pierre tha para gazetarëve se bisedimet midis zyrtarëve amerikanë dhe izraelitë janë duke vazhduar në Asamblenë e Përgjithshme të OKB-së në Nju Jork.
“Ata po i bëjnë ato diskutime. Zgjidhja diplomatike është thelbësore. Tensionet duhet të ndalen. Ne duhet të arrijmë në një armëpushim dhe kjo është ajo që ne po përpiqemi të arrijmë këtu”, u shpreh Jean- Pierre.
/rtsh.al/