Rusia e cila po drejtohet nga Vladimir Putin, i cili akuzohet për krime lufte kur ka hyrë në vitin e dytë të luftës në Ukrainë, pritet të marrë presidencën e Këshillit të Sigurimit të Kombeve të Bashkuara, organit më të fuqishëm që është i ngarkuar me ruajtjen e paqes dhe sigurisë globale.
Kjo nuk është pritur aspak mirë nga zyrtarët ukrainas. Ministri i Jashtëm i Ukrainës, Dmytro Kuleba e ka konsideruar marrjen e presidencës së Këshillit nga Rusia më 1 prill, në vitin e dytë të pushtimit të Ukrainës, si “shakaja më e keqe e 1 prillit”.
“Vendi që shkel në mënyrë sistematike të gjitha rregullat themelore të sigurisë ndërkombëtare po kryeson një organ, misioni i vetëm i të cilit është të ruajë dhe mbrojë sigurinë ndërkombëtare”, tha Kuleba.
Presidenca e Këshillit të Sigurimit drejtohet sipas alfabetit midis 15 vendeve anëtare. Ajo kontrollohet nga pesë anëtarët e tij të përhershëm, duke përfshirë SHBA-në dhe Rusinë, transmeton CNN.
Trupi diplomatik i OKB-së është i vetëdijshëm për skepticizmin publik për Rusinë që drejton këshillin ndërsa ushtria e saj pushton pjesë të Ukrainës, një vend anëtar i OKB-së.
Drejtuesi i radhës së Këshillit të Sigurimit supozohet të qëndrojë neutral, por në rolin e saj të ri, Rusia mund të manovrojë takimet për Ukrainën dhe ta përdorë muajin prill për të portretizuar SHBA-në dhe vendet e tjera perëndimore, se kanë adresuar akuza të rreme ndaj Moskës.
/rtsh.al/