Rusia e ka goditur Ukrainën me një raketë të re balistike me rreze të mesme veprimi.
Kështu pranoi këtë pasdite presidenti rus, Vladimir Putin.
Putin u shfaq në TV për t’iu drejtuar Forcave të Armatosura mbi situatën në Ukrainë, raporton agjencia Tass.
Ai tha se sulmet në territorin rus nga raketat me rreze të gjatë veprimi i kanë dhënë konfliktit në Ukrainë karakteristikat e një konflikti global.
“Që nga ky moment, siç e kemi nënvizuar vazhdimisht, konflikti në Ukrainë, i provokuar më parë nga Perëndimi, ka marrë elementë të një karakteri global”.
Presidenti nënvizoi se më 19 nëntor forcat e armatosura ukrainase sulmuan objektivat në rajonin Bryansk me gjashtë raketa ATACMS dhe më 21 nëntor me sistemet Storm Shadow në rajonin Kursk.
Ai shtoi se sistemet e mbrojtjes ajrore zmbrapsën sulmin, nuk pati viktima apo dëme serioze.
Putin vuri në dukje se përdorimi i armëve me rreze të gjatë për të goditur Rusinë pa specialistë nga vendet ku janë prodhuar është i pamundur.
Sipas tij, pas këtyre sulmeve konflikti në Ukrainë ka marrë elemente të karakterit global, por përdorimi i armëve të tilla nuk do të ndikojë në rrjedhë.
/rtsh.al/
