Pelegrinazhi i Bubësit është rikthyer në traditë 15 vjeçare. Përkujtimi i Baba Aliut, njërit prej përfaqësuesve më të ndritur të bektashizmit shqiptar dhe veçanërisht në zonën e Këlcyrës, ka mbledhur në Bubës pelegrinazhin e përvitshëm. Kjo tyrbe e rindërtuar me iniciativë të vëllezërve Zaimaj , banorë të fshatit, e ka shndërruar në traditë tashmë 15 vjeçare këtë festë. Sania, nëna e tyre tregon se si edhe në kohën e diktaturës e ruajti besimin.
Kësaj dite iu bashkua edhe kryegjyshi Botëror i Bektashizmit Haxhi Dede Edmond Brahimaj. Në fjalën përshëndetëse ai i bëri thirrje besimtarëve bektashianë që në regjistrimin e popullsisë këtë vit, të evidentojnë besimin e tyre si bektashinj.
Bubësi është një zonë rurale në Bashkinë e Këlcyrës, mungesa e infrastrukturës e bën të vështirë frekuentimin e tij nga turistë, por edhe aktivitetin e bujqësisë. Vetë banorët me iniciativë të tyre kanë nisur mbledhjen e një fondi për të investuar në rregullimin e rrugës.
Krahas migrimeve të shumta në Bubës ka edhe të rinj që e kanë rikthyer vëmendjen në fshatin e të parëve të tyre siç është rasti i Andit që sot ka investuar në bujqësi dhe agroturizëm, apo rasti i Ermalit që ka ringritur shtëpinë e vjetër.
Bubësi dhe fshatrat të cilët kufizohen me bashkitë e Përmetit, Skraparit dhe Poliçanit kanë një traditë të lidhur ngushtësisht me tyrbet dhe teqetë.
/rtsh./
