Presidenti Ilir Meta iu uron një vit të mbarë të gjithë nxënësve që nisin sot vitin e ri shkollor. Teksa publikon një foto i ulur mes nxënësve në bankat e shkollës, Meta uron që ky vit i ri shkollor të jetë plot arritje të shkëlqyera në rrugën e dijes, veçanërisht për vogëlushët që ulen sot për herë të parë në bankat e shkollës! “Një vit të mbarë dhe me plot arritje të shkëlqyera në rrugën e dijes, veçanërisht për vogëlushët, të cilët ulen sot për herë të parë në bankat e shkollës!Urime të ngrohta dhe shumë suksese për të gjithë mësuesit dhe profesorët në misionin e tyre fisnik”, shkruan Presidenti Meta.
Po ashtu Kryetari i PD-së, Lulzim Basha ka uruar nxënësit dhe mësuesit në nisjen e viti shkollor 2021-2020 “Urime të përzemërta nxënësve dhe mësuesve, anembanë Shqipërisë në nisjen e këtij viti shkollor! Urime prindërve që përmes punës dhe sakrificave ushqejnë ëndrrat dhe ambiciet e fëmijëve të tyre! Urime vogëlushëve që plot emocione ulen për herë të parë në bankat e shkollës, në hapjen e një kapitulli të rëndësishëm për jetën e tyre dhe gjithë shoqërisë sonë! Edhe ky vit i ri shkollor do të jetë sfidues për shkak të pandemisë, ndaj kujdesi nuk duhet të mungojë për të mbrojtur shëndetin e njëri-tjetrit dhe të familjeve tuaja. Suksese të gjithëve”, shprehet Basha.
Më herët edhe edhe Kryetarja e Kuvendit, Lindita Nikolla ka uruar sot fillimin e vitit të ri shkollor.Kryeparlamentarja thekson se “do të bëjmë më të mirën që në sfidë me vështirësitë e pandemisë të merrni cilësinë e merituar të dijes”. “Me rastin e fillimit të vitit të ri shkollor, ju uroj të gjithë fëmijëve të Shqipërisë një vit të suksesshëm shkollor! Të gjithë jemi me mendje e zemër tek ju dhe do të bëjmë më të mirën që edhe në sfidë me vështirësitë e pandemisë të merrni cilësinë e merituar të dijes në çdo klasë e shkollë të vendit. Jam besimplotë që mësuesit do të jenë krah jush dhe prindërve tuaj me përpjekjen e çdo dite për t’u ngritur mbi vështirësitë e kohës”, shprehet Nikolla. Sipas saj, beteja për dijen është më e bukura e jetës.
Ministrja e Shëndetësisë, Ogerta Manastirliu së bashku me nxënës të shtëpisë së fëmijës “Zyber Halluli” ka vizituar shkollën 9-vjeçare “Osman Myderizi”. Manastirliu i uron nxënësve e mësuesve një vit të mbarë e të shëndetshëm.
Rreth 500 mijë nxënës ulen sot në bankat e shkollave për të nisur vitin e ri shkollor në të gjithë vendin. Edhe këtë vit procesi mësimor do të zhvillohet me respektimin e masave antiCOVID.
