RTSH 24 Live

Kosova

Nga sot hyrja në Kosovë me dy doza të vaksinës

03/01/2022

Nga sot hyrja në Kosovë me dy doza të vaksinës

Duke nisur nga sot, secili qytetar që hyn në Kosovë duhet të ketë certifikatën e vaksinimit me dy doza të vaksinës anti COVID-19.

Në të kundërtën personat e pa vaksinuar me të dy dozat, nuk do të lejohen që të hyjnë në territorin e Kosovës.

Kështu ka vendosur Qeveria e Kosovës në fillim të dhjetorit të 2021-tës, kur edhe miratoi masat e reja anti COVID-19.

Personat të cilët nuk i kanë dy dozat e vaksinës, do t’iu mundësohet që të vaksinohen në aeroportin “Adem Jashari” dhe në pikat kufitare në Vermicë, Merdare, Dheu i Bardhë dhe Hani i Elezit.

“ Çdo person i cili hyn në Republikën e Kosovës duhet të posedojë një nga dëshmitë e mëposhtme:  Certifikatën e vaksinimit për vaksinimin e plotë (me dy doza) kundër COVID-19;  Certifikatën e vaksinimit për vaksinimin me një dozë, jo më e vjetër se katër (4) javë, bashkë me testin RT-PCR negativ për COVID-19, jo më i vjetër se 48 orë; Certifikatën e vaksinimit për vaksinimin me një dozë bashkë me dëshminë se personi ka kaluar COVID-19 (test RT-PCR pozitiv i lëshuar jo më pak se 21 ditë dhe jo më shumë se 180 ditë)”, thuhet në vendimin e qeverisë.

Shtetasve të Republikës së Kosovës, si dhe personave me leje qëndrimi të përkohshëm ose të përhershëm në Kosovë, të cilët nuk posedojnë ndonjë nga dëshmitë 2.1 deri 2.3 dhe kërkojnë të hyjnë në territorin e Republikës së Kosovës, iu jepet mundësia të vaksinohen nga ekipet mobile të vendosura në pikën kufitare ANP “Adem Jashari (për ata që hyjnë në rrugë ajrore), dhe në pikat kufitare në Vërmicë, Merdare, Dheu i Bardhë, Hani i Elezit (për ata që hyjnë në rrugë tokësore).

Por edhe pse dëshmia e vaksinimit me dy doza është e detyrueshme për të hyrë në Kosovë, sërish disa kategori qytetarësh do të jenë të përjashtuar nga ky vendim.

“ Personat të cilët hyjnë në Kosovë përmes aeroportit apo përmes pikave kufitare tokësore dhe largohen nga Kosova brenda tre (3) orësh përmes aeroportit ose pikave kufitare tokësore, me kusht që në hyrje të nënshkruaj deklaratën se do ta lëshojë Kosovën brenda tre (3) orësh; Personat, të cilët punojnë si transportues profesionist (vozitës), me kusht që të respektojnë protokollin për transport ndërkombëtarë për mbrojtje nga COVID-19; Shtetasit e Republikës së Kosovës që kanë dalë jashtë Kosovës në 12 orët e fundit; Qytetarët e huaj, të cilët kalojnë nëpër Kosovë përmes transportit të organizuar me autobus ose me linjë të rregullt ndërkombëtare, transit, me kusht që të nënshkruhet deklarata se do ta lëshojnë territorin e Kosovës brenda pesë (5) orësh; Diplomatët e huaj, të akredituar në Kosovë; Personat nën moshën dymbëdhjetë (12) vjeçare si dhe personat me dëshmi mjekësore që kanë kundërindikacione shkencërisht të vërtetuara për mosvaksinim. Personat e tillë duhet të paraqesin testin RT-PCR negativ për COVID-19, jo më i vjetër se 48 orë”, sqarohet në vendim.