Apple ka zbuluar katër versione të celularit të ri në selinë e saj në Cupertino. Apple ka zbuluar gamën e re të iPhone 14 me lidhje satelitore emergjente dhe teknologji për zbulimin e përplasjeve me makinë.
Kompania zbuloi produktet e gjeneratës së ardhshme iPhone, Watch dhe AirPod. iPhone 14 dhe iPhone 14 Plus janë në gjendje të dërgojnë një thirrje urgjente për ndihmë nëpërmjet satelitit. Telefoni do të shfaq vendndodhjen e satelitëve që kalojnë lart dhe do të demonstrojë se si ta drejtoni pajisjen drejt tyre. Mund të duhen nga 15 sekonda deri në disa minuta për të dërguar një mesazh bazë. iPhone 14 ka një çmim nga 799 dollarë. Gjigandi i teknologjisë njoftoi një kamerë të re 12 megapiksel, të aftë për të marrë foto të subjekteve që lëvizin shpejt, dhe kompania pretendon një përmirësim prej 49% në kapjen në dritë të ulët.
"Investimi për të shtuar aftësinë satelitore nuk duhet të nënvlerësohet. Apple-së ka të ngjarë të ketë marrë vite për të vendosur të gjitha pjesët e enigmës, duke përfshirë një marrëveshje komerciale me ofruesin satelitor Globalstar dhe krijimin e infrastrukturës së nevojshme për të kaluar mesazhet tek shërbimet e urgjencës", tha Ben Wood, analist kryesor në CCS Insight.
Analisti i teknologjisë Paolo Pescatore tha se ai besonte se inovacioni ishte një lajm i mirë për konsumatorët "në zona të vështira për t'u arritur". “Është inkurajuese të shohësh ofruesit që fillojnë të merren seriozisht me përdorimin e satelitit – përfundimisht lidhja e besueshme dhe e fuqishme është ende shumë e kërkuar nga të gjithë përdoruesit”, tha ai.
Ndryshimi më i madh në dizajnin e iPhone 14 Pro dhe iPhone 14 Pro Max është pjesa e sipërme e ekranit, e cila tani është një prerje në formë pilule. Një veçori e quajtur Dynamic Island ka zëvendësuar shkallën e zezë, për të cilën ankohen shumë përdorues të iPhone dhe mund të ndryshojë formën në varësi të njoftimeve që ka. Ndryshimi tjetër i madh është se celulari mund të mbetet gjithmonë i ndezur. Kur telefoni nuk është në përdorim, ekrani zbehet dhe shpejtësia e rifreskimit ulet. Celulari vjen në një ngjyrë vjollce të thellë së bashku me të zezën, argjendin dhe ari me një çmim prej 999 dollarë.
Ndërsa Apple Watch Series 8 ka një sërë veçorish të reja, duke përfshirë zbulimin e përplasjes me makinë, sensorët e temperaturës për gjurmimin e cikleve të ovulacionit dhe një opsion të ri të modalitetit me energji të ulët. Apple tha se një njoftim i ri automatik i ovulacionit retrospektiv mund të ndihmojë ata që po përpiqen të mbeten shtatzënë. Nëse aktivizohet, ora e re mund të monitorojë temperaturën e trupit çdo pesë sekonda gjatë natës dhe të zbulojë ndryshime të vogla që mund të sinjalizojnë ovulimin.
Një tjetër veçori e re është zbulimi i përplasjeve me makinë. Duke përdorur sensorë, ora do të jetë në gjendje të identifikojë një përplasje të rëndë dhe do të lidhë automatikisht përdoruesin e saj me shërbimet e urgjencës, do të sigurojë vendndodhjen e tyre të saktë dhe do të njoftojë kontaktet e urgjencës. Apple Watch Series 8 ka një çmim prej 399 dollarë në SHBA.
Po ashtu një tjetër risi e Apple janë dhe AirPods Pro të cilat janë më të lehta për t'u gjetur se paraardhësit e tyre. Çdo palë vjen me një sistem të ri për gjetjen e kufjeve individuale të humbura, të cilat luajnë një tingull kur bien jashtë kasës. Për më tepër, vetë kasa ka altoparlantin e vet, i cili do të luajë një tingull më të lartë kur të kërkohet nga aplikacioni Find My. AirPods Pro i ri ka një çmim prej 249 dollarë.
/rtsh.al/
