Jerry Lee Lewis , pionieri i rock'n'roll-it amerikan, që u bë një nga figurat më famëkeqe të kësaj muzike, ka ndërruar jetë në moshën 87-vjeçare. Artisti dha frymën e fundit në shtëpinë e tij në DeSoto County, Mississippi.
Performancat energjike të Lewis, duke përfshirë këngën “Great Balls of Fire”, ndihmuan në instalimin e rock'n'roll si muzika pop dominuese amerikane e viteve 1950.
Ai lindi në Luiziana në vitin 1935, djali i një familjeje të varfër fermere që la peng shtëpinë e tyre për t'i blerë Lewis pianon e tij të parë. Ndërsa mësonte instrumentin dhe studionte në një shkollë ungjillore, ai u përjashtua për interpretimin e një versioni boogie-woogie të My God is Real që u konsiderua i pandershëm.
Ai nuk u kthye më në shkollë dhe filloi të luante live, ku performanca e tij e parë ishte në moshën 14 vjeçare. Disa nga regjistrimet e tij më të hershme u bënë në vitin 1956 me Elvis Presley , Johnny Cash dhe Carl Perkins.
Zbulimi i Lewis-it erdhi një vit më pas, me “Whole Lotta Shakin' Goin' On”, një këngë rock'n'roll e drejtuar nga piano. Kur ai e performoi atë në televizion në shfaqjen e Steve Allen, solli në vëmendjen kombëtare stilin e tij unik të të luajturit, jashtëzakonisht energjik.
Gjatë një turneu në Mbretërinë e Bashkuar të vitit 1958 në kulmin e famës së tij, ai u përfshi në skandal pasi u zbulua se ishte martuar me kushërirën e tij 13-vjeçare, Myra Brown, kjo do të ishte e treta nga shtatë martesat e tij. Kishte zemërim në shtypin britanik dhe pjesa tjetër e turneut të tij u anulua. Stacionet radiofonike amerikane dhe promovuesit e koncerteve gjithashtu e futën në listën e zezë dhe popullariteti i tij u zbeh. Ai nuk pati më kurrë një hit në Top 20 të SHBA.
Reputacioni e tij prej “njeriu të egër” e forcoi me pseudonimin e tij, “Vrasësi”, i fituar nga zakoni i tij për të përshkruar të njohurit me zhargonin e Luizianës "vrasësit". Pas një martese 13-vjeçare me Brown, martesa e tij e katërt dhe e pestë ishin edhe më famëkeqe. Dy nga gratë e tij, Jaren Pate dhe Shawn Stephens vdiqën të dyja në rrethana të dyshimta, e pari duke u mbytur, ndërsa kishte thashetheme për abuzim në familje që rrethonin historinw e Stephens.
Dy nga gjashtë fëmijët e Lewis, vdiqën të rinj: Steve Allen Lewis u mbyt në një pishinë në moshën tre vjeçare, ndërsa Jerry Lee Lewis Jr, i cili kishte luajtur në bateri për babain e tij, vdiq në një aksident me makinë në moshën 19-vjeçare.
Lewis regjistroi 40 albume në studio, më i fundit ishte Rock & Roll Time në vitin 2014. Albumi i tij i mëparshëm, Mean Old Man, arriti në Top 30 në SHBA në publikimin e tij në vitin 2010 dhe kishte duete me yje duke përfshirë Mick Jagger, Sheryl Croë, Willie Nelson dhe Eric Clapton./ The Guardian
/rtsh.al/
