Presidenti ukrainas Volodymyr Zelensky ka kritikuar presidencën ruse të Këshillit të Sigurimit të Kombeve të Bashkuara, e cila mori sot drejtimin e saj.
“Fatkeqësisht, këto janë lajme padyshim absurde dhe shkatërruese. Sot, shteti terrorist filloi të kryesojë Këshillin e Sigurimit të OKB-së.
Dje, ushtria ruse vrau një fëmijë tjetër ukrainas - një djalë pesë muajsh të quajtur Danylo nga Avdiivka, në Donbas.
Prindërit e tij u plagosën. Një nga qindra sulmet e artilerisë që shteti terrorist fillon çdo ditë dhe në të njëjtën kohë, Rusia kryeson Këshillin e Sigurimit të OKB-së”, është shprehur Zelensky.
Zelensky tha gjithashtu se raste të tilla “dëshmojnë falimentimin e plotë” të institucioneve globale. Ai argumentoi se reforma është "qartësisht e vonuar" për Këshillin e Sigurimit.
Këshilli kërkon konsensus për të miratuar shumicën e vendimeve, pavarësisht se cili vend është në krye të mbledhjeve të tij.
/rtsh.al/