Në kuadër të megaoperacionit “Territor i pastër” janë zbuluar edhe 3 parcela me kanabis në fshatrat e Krujës.
Në kuadër të vijimit të kontrollit të territorit, në fshatrat Kuçaj, Zezë dhe Verjon u zbuluan 685 fidanë kanabis të kultivuar në tokë, të cilat u asgjësuan përmes djegies.
Kjo është faza e 8-të e këtij megaoperacioni, ndërsa në kontrolle u përfshinë 100 punonjës policie të Komisariatit të Policisë Krujë dhe të Forcës së Posaçme Operacionale e DVP Durrës, 6 grupe të FNSH Tiranë dhe 5 dronë.
Për rastin policia ka identifikuar “53-vjeçarin A. D., banues në fshatin Zezë, si autor i dyshuar i 250 fidanëve kanabis që u gjetën të kultivuar në afërsi të banesës së tij” dhe është shpallur në kërkim.
Vijojnë veprimet hetimore për identifikimin dhe kapjen e autorit/ëve të tjerë të kësaj veprimtarie kriminale.
Materialet procedurale i kaluan Prokurorisë për veprime të mëtejshme, për veprën penale "Kultivimi i bimëve narkotike".
/rtsh.al/
