RTSH 24 Live

Rajoni

Marrëveshja për targat/ Vuçiç: Një fitore e vogël taktike, Kurti: Për herë të parë procesi i dialogut hyn në fazë negociimi

24/11/2022

Marrëveshja për targat/ Vuçiç: Një fitore e vogël taktike, Kurti: Për herë të parë procesi i dialogut hyn në fazë negociimi

Presidenti serb Aleksandar Vuçiç e ka konsideruar një fitore të vogël taktike, marrëveshjen e arritur në Bruksel me Kosovën për çështjen e targave, ndërsa insistoi që të respektohen të gjitha marrëveshjet e arritura edhe më parë. Me rëndësi sipas Vuçiç është që negociatat mes dy vendeve janë në vazhdim.

“Vetëm dhjetë ditë më parë kur ishim në prag të konfliktit, të gjithë thoshin se çfarë po flisni për pjatat, ne kemi nevojë për paqe, nuk duam konflikte, nuk duam luftëra. Kur merr një vendim që do të thotë të ruash paqen, atëherë ata thonë se çfarë ke tradhtuar, çfarë ke sjellë. Unë insistoj që të respektohen të gjitha marrëveshjet e arritura më parë. Tabelat KM mbeten dhe vazhdojnë. Sa i përket makinave të reja janë 90 KM targa në vit. Ajo që është e rëndësishme për ne është që negociatat janë në vazhdim, targat KM janë të vlefshme. Kjo është një fitore e vogël taktike për sa i përket statusit. Na presin kohë të vështira, jam i kënaqur që e ruajtëm paqen për popullin tonë”, tha Vuçiç.

Për kryeministrin e Kosovës, Albin Kurti, ajo që ndodhi në Bruksel, nuk ishte një marrëveshje për targat, por arritja e synimit që propozimi-franko gjerman për dialogun mes Kosovës dhe Serbisë të bëhej çështje e bisedimeve. Teksa e vlerësoi si një arritje, shprehu besimin për një marrëveshje që do t’i zgjidhë problemet thelbësore mes dy vendeve.

“Besoj që kjo është një arritje e madhe sepse për herë të parë procesi i dialogut hyn në një fazë të negocimit mbi kornizën e përgjithshme, që do të jetë ligjërisht e obligueshme e që do t’i zgjidhë problemet fundamentale nga prizmi i së drejtës ndërkombëtare”, u shpreh ai.

Mbrëmjen e së mërkurës (23 nëntor) Kosova dhe Serbia arritën marrëveshjen për çështjen e targave. Marrëveshje e firmosur, me ndërmjetësimin e Bashkimit Evropian, përmban ndalimin e lëshimit të targave nga Serbia me emërtimet e qyteteve të Kosovës, ndërsa kjo e fundit do të ndërpresë ndalimin e automjeteve serbe në kufi për riregjistrim të tyre.

/rtsh.al/