Lagjja historike e qytetit të Përmetit, e vendosur nën kurorën e gjelbër dhe me arkitekturën e veçantë të ndërtesave dhe rrugicat me kalldrëme, gjithnjë e më tepër po ngjall interesin e banorëve për të investuar, sidomos në sektorin e turizmit. Banorët pohojnë se nga viti në vit kjo lagje po krijon dhe forcon identitetin e saj, duke u shndërruar në një pikë tërheqëse për vizitorët vendas dhe të huaj.
“Është bërë një lagje e bukur, e pastër, portat janë bërë të gjitha njëlloj dhe jemi shumë krenar që ka vizitor dhe vijnë dhe u pëlqen shumë Përmeti”, u shpreh një banore.
Zhvillimi i turizmit po ndikon në ekonominë e zonës, duke rritur kërkesën për shërbime dhe biznese të lidhura me turizmin, si akomodimi, restorantet dhe artizanati vendas.
“Kanë qenë në emigracion dhe janë kthyer dhe kanë krijuar bujtinat”, u shpreh një banor tjetër.
Njëkohësisht, investimet qeveritare, lokale dhe te vete banoreve po kontribuojnë në ruajtjen e traditave arkitekturore, gjithashtu edhe në pasurimin e kulturës lokale, duke ofruar një përvojë autentike për ata që vizitojnë këtë qytet.
Gazetare: L. Koçiu
/rtsh.al/
