Kufijtë në zonën Schengen do të vijojnë të qëndrojnë të hapur, por liderët e Bashkimit Evropian kërkojnë që të reduktohen sa më shumë udhëtimet, njofton Euronews. Qëllimi kryesor është të mbahet nën kontroll përhapja e virusit pa qenë e nevojshme të pezullohen rregullat e lëvizjes Schengen.
Në vendet e cilësuara pika të nxehta të COVID-19, udhëtarëve do t’u kërkohet një test PCR dhe do të vendosin si masë të nevojshme edhe karantinimin e udhëtarëve.
"Në këtë situatë me të vërtetë serioze shëndetësore, të gjitha udhëtimet jo thelbësore duhet të dekurajohen me forcë si brenda vendi edhe jashtë kufijve.
Në të njëjtën kohë është shumë e rëndësishme që tregu i përbashkët të vijojë punën. Pra, punonjësit thelbësorë të mallrave duhet të kalojnë kufijtë pa problem. Është me rëndësi të madhe. Në lidhje me kufijtë e jashtëm do të propozojmë shtimin e masave të sigurisë”, tha Ursula von der Leyen, presidente e Komisionit Evropian.
Një tjetër çështje e rëndësishme e diskutuar nga liderët e BE ishte strategjia e vaksinimit, ku janë shtuar shqetësimet ndaj kompanive farmaceutike për vonesat në shpërndarje.
"Udhëheqësit duan që vaksinimi të përshpejtohet, dhe në këtë drejtim, angazhimet për dërgesat e bëra nga kompanitë duhet të respektohen.
Liderët rikonfirmuan se vaksinat duhet të shpërndahen në të njëjtën kohë dhe duhet të jenë në bazë të popullatës. Dhe ne riafirmuam nevojën për të pasur një monitorim afërt të procesit të vaksinimit. Të gjitha mjetet e mundshme do të shqyrtohen për të siguruar furnizim të shpejtë, përfshirë shpërndarjen e hershme për të shmangur vonesat", u shpreh Charles Michel, president i Këshillit Evropian.
Propozimi më përçarës në samitin e BE erdhi nga një grup i vogël vendesh: ata kërkojnë një sistem të shpejt udhëtimi për ata që vaksinohen. Kjo, sipas tyre mund të përshpejtojë rimëkëmbjen ekonomike. Kritikët argumentojnë se mund të shkaktojë diskriminim.
