Kancelarja gjermane Angela Merkel do të vizitojë sot Tiranën. Ajo do të pritet nga kryeministri Edi Rama në një ceremoni të dedikuar në Pallatin e Brigadave. Një takim kokë më kokë me kreun e qeverisë shqiptare, i paraprin takimit të delegacioneve të të dy palëve. Më pas kancelarja gjermane do të zhvillojë një takim të përbashkët edhe me kryeministrat e vendeve të Ballkanit Perëndimor. Cështjet e Procesit të Ballkanit, bashkëpunimi rajonal, por edhe integrimi i Ballkanit Perëndimor në BE, do të jenë disa prej cështjeve që pritet të diskutohen ditën e sotme.
Programi i vizitës së Kacelares së Republikës Federale të Gjermanisë, Angela Merkel
10.20 – Ceremonia e mikpritjes në Pallatin e Brigadave.
10.30 – Takim Tete-a-tete mes Kryeministrit Edi Rama dhe Kancelares Angela Merkel në Pallatin e Brigadave.
11.00 – Takim bilateral mes dy delegacioneve në Pallatin e Brigadave.
11.50 – Mbërritja e Kryeministrit dhe krerëve të qeverive të Ballkanit në Tirana Business Park.
11.55 – Mbërritja e Kancelares Merkel në Tirana Business Park.
12.00 – Foto Familjare me krerët e delegacioneve në Tirana Business Park.
14.35 – Konferencë për shtyp mes Kryeministrit Rama dhe Kancelares Merkel në Tirana Business Park.
Ndërkohë Policia e Shtetit njoftoi dje masat e marra për ditën e sotme, gjatë vizitës së Kancelares së Gjermanisë, Angela Merkel, në Tiranë.
Policia bëri me dije se do të ketë bllokime dhe devijime të lëvizjes së automjeteve në Rinas-Unaza e Re, Sauk, Rruga e Elbasanit deri tek Pallati i Brigadave, sot nga ora 09:00 deri në orën 13:00.
Uniformat blu iu bëjnë thirrje drejtuesve të automjeteve që të shmangin lëvizjen në këto segmente rrugore, me qëllim moskrijimin e mbingarkesës në trafik.
