Të paktën katër persona kanë humbur jetën dhe dhjetëra janë zhdukur, pasi një ortek goditi një ekip alpinistësh në Himalajet indiane. 34 kursantët dhe shtatë instruktorë po praktikonin ski, kur u goditën në zbritje nga një ortek në shtetin verior të Uttarakhand.
Tetë persona nga grupi besohet se janë shpëtuar, ndërsa pjesa tjetër është bllokuar në një çarje. Moti i keq po pengon kërkimet. Raportet e mediave lokale thonë se numri i viktimave mund të rritet ndjeshëm.
Grupi përbëhej nga kursantë nga Instituti i Alpinizmit Nehru aty pranë. Personat ishin duke u kthyer nga mali Draupadi Danda-2, kur ra orteku. "Ne kemi konfirmim për katër të vdekur, ndërsa 33 të tjerë janë bllokuar. Rreth tetë prej tyre tashmë janë shpëtuar, pjesa tjetër është bllokuar në një çarje," i tha agjencisë së lajmeve AFP Ridhim Aggarwal nga Forca Shtetërore e Reagimit ndaj Fatkeqësive.
“Përpjekjet e shpëtimit do të vazhdojnë për aq kohë sa të lejojë moti,”- tha ai. Ministri i Mbrojtjes Rajnath Singh shkroi në Twitter: "Jemi thellësisht të shqetësuar nga humbja e jetëve, për shkak të rrëshqitjes së ortekut që ka goditur ekspeditën alpinistike të kryer nga Instituti i Alpinizmit Nehru në Uttarkashi".
Tragjedia vjen një javë pasi trupi i alpinistes së famshme amerikane të skive, Hilaree Nelson, u gjet në Himalajet Nepaleze. Zonja Nelson, e konsideruar si një nga alpinistët më të mëdha të brezit të saj, u raportua se kishte rënë në një të çarë të thellë, pasi arriti majën e malit Manaslu. BBC
/rtsh.al/
