Hilari Athanas është vetëm 10 vjeç, por një emër premtues në muzikë. Ajo ka filluar të këndojë që në moshë të vogël dhe prej 3 vitesh ka marrë pjesë në festivalin e këngës për fëmijë në Korçë, ku është vlerësuar me çmime. Në edicionin e 53-të të këtij festivali që u zhvillua në 30 tetor të vitit të kaluar ajo u shpall fituese me këngën “Jam fëmijë” me muzikë të Endri Prifti dhe orkestrim të Gent Myftaraj.
Hilari ndjek studimet në shkollën e muzikës “Tefta Tashko Koço” në qytetin e Korçës, ku prej 5 vitesh studion violinë. Ajo thotë se nuk i ndan dot këto dy pasione të sajat.
Për tekstet e këngëve të saj kujdeset e ëma, Julia Athanas. Në fundvitin e 2020-tës Hilari ka realizuar dhe videoklipin e saj të parë për këngën “Viti i Ri”, me muzikë dhe orkestrim nga Zhani Llogori, që ka ardhur si një kartolinë urimi për gjithë vogëlushët.
Edhe pse e vogël në moshë, Hilari duket se e ka nisur mbarë rrugën e artit dhe të muzikës.
