Prokuroria e Tiranës nisi më 21 qershor hetimet për grisjen e regjistrave të Kadastrës pas denoncimit të bërë nga Artan Lame. Në kuadër të hetimeve për përgjegjësit e dëmtimit, grisjes dhe ndryshimit të regjistrave të Kadastrës, Prokuroria e Tiranës ka sekuestruar listën e punonjësve që kanë patur akses në regjistrat e pronës gjatë viteve të fundit.
“Prokuroria e Tiranës nis kryesisht hetimet për veprat penale të “Shpërdorimit të detyrës” dhe “Zhdukjes dhe vjedhjes se dokumentave” për humbjen apo dëmtime të tjera të regjistrave të kadastrës Tiranë. Prokuroria pranë Gjykatës së Shkallës së Parë Tiranë, duke marrë shkas nga deklaratat e bëra në mediat e shkruara dhe audiovizive nga ana e Drejtorit të Përgjithshëm të Agjensisë Shtetërore të Kadastrës, Z. Artan Lame, lidhur me humbjen apo dëmtime të tjera të faqeve të regjistrave të kadastrës, për zonat në zhvillim të Tiranës si Farka, Ndroqi, Shën Gjergji etj, ka filluar kryesisht, hetimet duke regjistruar procedimin penal nr. 4807 datë 21.06.2022, për veprat penale të “Shpërdorimit të detyrës” dhe “Zhdukjes dhe vjedhjes se dokumentave”, parashikuar nga neni 248 dhe 192/a i Kodit Penal, pa autorë të dyshuar. Lidhur me faktet e sipërpërmendura Prokuroria pranë Gjykatës së Shkallës së Parë Tiranë, është e angazhuar maksimalisht që të hetojë në drejtim të zbulimit dhe vënies përpara përgjegjësisë penale të çdo zyrtari apo personi të përfshirë në veprimtari të kundraligjshme në dëm të interesave të ligjshme te qytetarëve apo shtetit”, bënte me dije Prokuroria. Lëvizja e Prokurorisë erdhi pas deklaratës së Kreut të Kadastrës Artan Lame i cili bëri me dije se vetëm 250 regjistra nga 2342 në total rezultuan të padëmtuar.
/rtsh.al/
