Sali Berisha ka hedhur akuza të forta ndaj ambasadores Yuri Kim duke thënë se po bën fushatë elektorale kundër tij për të caktuar kryetarin e PD-së. Nga Elbasani, ku nisi fushatën për kreun e Partisë Demokratike, Berisha komentoi deklaratën e ambasadores Yuri Kim e cila tha se “asnjë vendim ‘non grata” dhënë nga SHBA nuk është ndryshuar deri më sot”. Për Berishën kjo është fushatë kundër tij dhe ndërhyrje e ambasadores në punët e brendshme të PD.
“Fushatë elektorale kundër Berishës në prag të garës së tij për kryetar të PD. Kaq ashtë komenti im. I bëj thirrje qeverisë së SHBA dhe Biden mos të lejoje përfaqësues të tij që të ndërhyjnë në punë të brendshme të PD dhe përpjekje të paimagjinueshme për të caktuar kryetarin e opozitës shqiptare, partisë konservatore shqiptare. Kaq kisha!”, tha Berisha.
Më herët ambasadorja Kim tha se ka “mbi 200 persona janë përcaktuar nga Sekretari i Shtetit për korrupsioni domethënës dhe iu është ndaluar hyrja në SHBA dhe nga këta, zero raste janë zmbrapsur”.
Berisha foli edhe për mospranimin e mocionit të tij për masakrën e Srebrenicës në Kuvend, ku tha se PS fshihet pas non grata-s për të mos e futur mocionin në kalendarin e punës.
“Nuk kishte gjë më të rëndë se ajo e djeshmja. Si mund të kemi ndjeshmëri ndaj kombi që ka varrosur 8 mijë djem dhe burra. Njeri pa përgjegjësi ka qenë njeriu primitiv. Del e thotë fajin e ka ky për rezolutën. Çfarë ishte kjo? Çështja e non grata-s ishte motiv për të dalë kundër. Mua më motivonte krenaria e të qenit shqiptar”, tha Berisha.
Më 22 maj Partia Demokratike do të zhvillojë zgjedhjet për kryetarin e partisë, ku dy kandidatët janë Sali Berisha dhe Ibsen Elezi. Vetë Elezi ka thënë më herët se gara është e pabarabartë dhe e cilësuar Komisionin e Rithemelimit si “manipulator votash”.
/rtsh.al/