Dhjetë parti opozitare kanë firmosur paktin e bashkëpunimit për zgjedhjet vendore të 14 majit.
Nën drejtimin e kandidatit për bashkinë e Elbasanit të Partisë Demokratike, Luçiano Boçi, 10 partitë kanë nënshkruar marrëveshjen e koalicionit.
Në këtë koalicion bëjnë pjesë Partia Demokratike, Partia e Lirisë, Partia Demokristiane, Lëvizja për Zhvillim Kombëtar, Lëvizja e Legalitetit, Partia Republikane, Partia Agrare Ambientaliste, Partia për Europianizim dhe Integrim, Aleanca Liberale e Djathtë dhe Balli Kombëtar.
Në marrëveshjen e tyre, ata deklarojnë se në kushtet e dhunimit masiv të standardeve minimale të jetës politike, ekonomike dhe shoqërore të vendit nga makineria shtetërore e kontrolluar prej Partisë Socialiste, “të mbrojmë moralisht dhe fizikisht integritetin e zgjedhjeve vendore të 14 majit 2023 duke respektuar në maksimum çdo standard demokratik dhe çdo parashikim ligjor dhe kushtetues, i cili ndihmon në përfaqësimin e drejtë dhe mbrojtjen e vullnetit të zgjedhësve”.
/rtsh.al/
