Një ekspozitë me 26 fotografi, të fotografit të njohur shqiptar Roland Tasho, me personalitete të huaj të veshur me kostumet kombëtare shqiptare, është çelur në qytetin e Korçës, me rastin e festave të 28 dhe 29 Nëntorit. Cikli i personazheve të huaj me veshjet popullore të shumë krahinave është një motiv i njohur në fotografitë e Roland Tashos, një projekt gati 20-vjeçar. Që nga ambasadorë e albanologë të njohur si dhe personazhe të tjerë publikë të politikës, artit, sportit e medias janë fokusi i objektivit të Tashos.
Imazhet e mjaft të huajve të veshur me kostumet kombëtare shqiptare, janë cilësuar si një iniciativë e vyer e fotografit Tasho, në ndërtimin e urave të komunikimit mes popujve. Ekspozita do të qëndrojë e hapur për publikun këtë fundjavë, në ambientet e galerisë se bibliotekës së qytetit.
