RTSH 24 Live

Kronika

Durrës/ Falsifikuan dokumentet dhe i morën 5000 m² tokë një personi, në pranga 3 persona, mes tyre dhe ish-juristi hipotekës

18/01/2023

Durrës/ Falsifikuan dokumentet dhe i morën 5000 m² tokë një personi, në pranga 3 persona, mes tyre dhe ish-juristi hipotekës

Tre persona kanë rënë në prangat e Policisë këtë të mërkurë në Durrës, të akuzuar se i kanë marrë 5000 m² tokë një personi, nëpërmjet dokumenteve të falsifikuara.

Janë arrestuar ish-juristi i hipotekës së Durrësit, A. I., 60 vjeç dhe 2 personat që përfituan nëpërmjet falsifikimit të dokumenteve, Z. D., 72 vjeç, dhe F. I., 68 vjeç, të cilët e regjistruan tokën në hipotekë si të tyren.

Ata u vunë në pranga pas një hetimi disamujor, ku u provua mashtrimi i kryer prej tyre. Gjykata e Durrësit ka caktuar ndaj tyre masën e sigurisë “arrest në burg”, ndërsa akuzohen për veprat penale “Shpërdorimi i detyrës” dhe  “Falsifikimi i dokumenteve”, kryer në bashkëpunim.

Njoftimi i plotë:

Durrës

Finalizohet operacioni policor i koduar “Kthimi”.

I morën 5000 m² tokë një shtetasi, duke e përvetësuar dhe regjistruar në hipotekë si të tyren, nëpërmjet dokumenteve të falsifikuara, kapen dhe vihen në pranga 3 shtetas. Vihen në pranga ish-juristi i hipotekës së Durrësit dhe 2 shtetasit që përfituan nëpërmjet falsifikimit të dokumenteve, tokën e një shtetasi tjetër.

Ndaj këtyre 3 shtetasve, Gjykata e Rrethit Gjyqësor Durrës ka caktuar masën e sigurisë “Arrest në burg”.

Specialistët për Hetimin e Krimeve Ekonomike dhe Financiare të Drejtorisë Vendore të Policisë Durrës, në vijim të punës për evidentimin dhe goditjen e veprimtarisë kriminale të falsifikimit të dokumenteve me qëllim përfitimin, bazuar dhe në inteligjencën informative, pas një hetimi disamujor me metoda proaktive, në bashkëpunim me Prokurorinë pranë Gjykatës së Rrethit Gjyqesor Durrës, finalizuan me sukses operacionin policor të koduar “Kthimi”.

Në kuadër të këtij operacioni u bë e mundur kapja dhe ekzekutimi i masave të sigurisë “Arrest në burg” për shtetasit:

  1. I., 60 vjeç, ish-jurist i hipotekës së Durrësit;
  2. D., 72 vjeç, dhe F. I., 68 vjeç, banues në Durrës.

Bazuar në provat e siguruara gjatë hetimit proaktiv, të kryer nga specialistët për Hetimin e Krimeve Ekonomike dhe Financiare, në bashkëpunim me Prokurorinë, Gjykata e Rrethit Gjyqësor Durrës, më datë 15.01.2023, ka caktuar për këta shtetas masat e sigurisë  “Arrest në burg”, për veprat penale “Shpërdorimi i detyrës” dhe  “Falsifikimi i dokumenteve”, kryer në bashkëpunim.

Këta shtetas, në bashkëpunim me njëri-tjetrin, duke përdorur dokumente të falsifikuara, i kanë marrë rreth 5000 m² tokë një shtetasi, të cilën e kanë përvetësuar dhe regjistruar në hipotekë si të tyren. 

Specialistët për Hetimin e Krimeve Ekonomike dhe Financiare të Drejtorisë Vendore të Policisë Durrës, në bashkëpunim me Prokurorinë, po vijojnë hetimet për dokumentimin e rasteve të tjera të kryera nga këta shtetas, si dhe për identifikimin dhe arrestimin e personave të tjerë të implikuar në këtë veprimtari kriminale.

/rtsh.al/