1600 të mitur kanë kryer vepra penale në vendin tonë gjatë vitit 2021. Që prej vitit 2018 ka hyrë në fuqi ligji për të drejtat dhe mbrojtjen e fëmijës, që parashikon ndjekjen e të miturve të kësaj kategorie që janë në gjendje të lirë nga njësitë e mbrojtjes së fëmijëve.
Gjatë një takimi të organizuar nga Komiteti Shqiptar i Helsinkit për drejtësinë për të mitur, Drejtuesja e Agjencisë Shtetërore për të Drejtat dhe Mbrojtjen e Fëmijëve, Alma Tandili u ndal në nevojën e rritjes së kapaciteteve.
Drejtoresha ekzekutive e KSHH, Erida Skëndaj tha se tashmë janë ngritur mekanizmat për të siguruar mbrojtjen e fëmijëve në konflikt me ligjin, ndërsa nevojitet rritja e bashkëpunimit mes institucioneve, por edhe shoqërisë civile.
Në këtë takim u nënvizua nevoja për ndjekjen e rasteve deri në rehabilitimin e tyre, duke përfshirë ngritjen e qendrave për aktivitete jashtëshkollore.
/rtsh.al/
