Lideri i Aleancës për Ardhmërinë e Kosovës, Ramush Haradinaj ka reaguar ndaj ngjarjeve në veri të Kosovës, ku u dogjën pesë makina me targa të Republikës së Kosovës.
Sipas Haradinajt, incidentet e ditëve të fundit janë tregues serioz se mund të ketë një skenar për të penguar zgjedhjet në veri, me pasoja edhe për sigurinë në atë pjesë të vendit.
“Incidentet e 2-3 ditëve të fundit në veri, janë tregues serioz se mund të ketë një skenar të pengimit të zgjedhjeve në veri, me pasoja edhe për sigurinë në atë zonë. Refuzimi i Listës Serbe për të marrë pjesë në zgjedhjet lokale atje, shpërfaq mosgatishmërinë e palës serbe që të zbatojë marrëveshjen e arritur në Bruksel”, shkruan Haradinaj në një postim në rrjetin social, në Facebook.
Ai më tej thotë se refuzimi i Listës Serbe për të marr pjesë në zgjedhjet lokale atje shpërfaq mosgatishmërinë e palës serbe që të zbatojë marrëveshjen e arritur në Bruksel.
Haradinaj ka kërkuar që Serbia dhe Kosova të zbatojnë marrëveshjen e Brukselit dhe ankesin e takimit të Ohrit.
“Serbia dhe Kosova duhet që urgjentisht të fillojnë me përmbushjen e obligimeve që dalin nga Marrëveshja e Brukselit dhe Aneksi i Ohrit. Presidenti i Serbisë të heqë dorë nga destruktiviteti dhe t’i urdhërojë njerëzit e tij që të heqin dorë nga sulmet e dhunshme.
Njëkohësisht, kërkoj nga BE dhe ShBA që të shfrytëzojnë gjithë mekanizmat e tyre që ta mbrojnë suksesin e arritur me Marrëveshjen për Normalizimin e Marrëdhënieve Kosovë-Serbi, të sponsorizuar prej tyre, si bazë e fortë e rivendosjes së rendit dhe ligjit në veri të Kosovës”, thekson Haradinaj.
/rtsh.al/
