Grupi Parlamentar i Partisë Demokratike ka vendosur ngujimin në selinë blu, për të shmangur arrestimin e deputetit Ervin Salianji, pasi Gjykata e Apelit la në fuqi vendimin me 1 vit burg për kallëzim të rremë.
Ditën e djeshme (26 shtator), pas dhënies së vendimit, Salianji tha se do të vetëdorëzohej në Polici. Ndërkohë, sot deklaroi se vazhdonte të kishte të njëjtin qëndrim, por theksoi se do të respektojë vendimin e Grupit Parlamentar.
Të enjten, Gjykata e Apelit la në fuqi vendimin e Shkallës së Parë që dënoi me 1 vit burg Salianjin lidhur me çështjen “Babale”. Në maj të vitit 2018 gazetari Jetmir Olldashi dhe Fredi Alizoti, personazhi i njohur si “Babale”, pretenduan se kishin regjistruar një audio përgjim me vëllain e ish-ministrit të Brendshëm asokohe, Fatmir Xhafajt dhe se Geron Xhafaj kryente aktivitetin e trafikimit të narkotikëve.
/rtsh.al/
