RTSH 24 Live

Botë

Çmimi i naftës mbi 70 dollarë pavarësisht shqetësimeve mes përhapjes së variantit Delta

23/07/2021

Çmimi i naftës mbi 70 dollarë pavarësisht shqetësimeve mes përhapjes së variantit Delta

Çmimet e naftës mbetën mbi 70 dollarë pas një rënie të mprehtë gjatë javës pasi OPEC dhe OPEC-plus ranë dakord të rrisin prodhimin e naftës që nga gushti si dhe për shkak të shqetësimeve se rastet me COVID-19 mund të pengojnë rritjen e kërkesës për naftë.

Standardi ndërkombëtar i naftës së papërpunuar Brent tregtohej me 73.59 dollarë për fuçi me një humbje prej 0.27 për qind pasi u mbyll të enjten me 73.79 dollarë për fuçi.

Brendi amerikan West Texas Intermediate (WTI) tregtohej me 71.67 dollarë për fuçi në të njëjtën kohë me një rënie prej 0.36 për qind pas mbylljes së mëparshme me 71.91 dollarë për fuçi.

Ndërsa shqetësimet rreth perspektivës së rritjes ekonomike dhe kërkesës për naftë vazhdojnë për shkak të valës së re të variantit Delta të virusit COVID-19, çmimet e naftës arritën të mbeten në 70 dollarë përpara mbylljes së javës megjithëse çmimet ranë në nivelin 68 dollarë më herët gjatë javës.

Për herë të parë i shfaqur në Indi dhe i cili raportohet të jetë më rezistent ndaj vaksinave ekzistuese, Delta është përhapur në 100 vende deri më tani. Organizata Botërore e Shëndetësisë (OBSH) pret që Delta të jetë lloji më dominues i COVID-19 në të gjithë botën.

Drejtoresha e Qendrave Amerikane për Parandalimin dhe Kontrollin e Sëmundjeve (CDC), Rochelle Walensky tha se SHBA-ja është në "një moment tjetër thelbësor" të pandemisë ndërsa rastet me COVID-19 rriten në pjesët e pavaksinuara të vendit, veçanërisht Delta.

Çmimet gjithashtu patën një ndikim negativ pasi vendet e OPEC-plus njoftuan vendimin e tyre për të rritur prodhimin me 400 mijë fuçi që nga gushti, duke shtuar frikën e furnizimit gjatë javës, por ndikimi i tij mbeti i kufizuar./AA