Lulzim Basha ka thirrur sërish grupin parlamentar të PD-së për të konkretizuar nismat e opozitës si beteja të ardhshme të saj në Parlament. Në fjalën e tij, Basha e ka cilësuar situatën ekonomike shumë të rëndë dhe se për këtë ka bërë të ditur se PD do të paraqesë në Parlament nismën për uljen e TVSH.
"Situata ekonomike është shumë e rendë. Rritja e çmimeve ka bërë që shumica e familjeve të mos përballojnë dot as shpenzimet për ushqimet bazike. Prandaj si masë emergjence do të kërkojmë uljen e TVSHsë për produktet e shportës, nga 20 në 6%. Buxheti, që sot përdoret për të nginjur klientët dhe oligarkët e pushtetit, duhet të orientohet një orë e më parë nga nevojat e familjeve shqiptare", tha Basha.
Ndërsa si prioritare ka bërë të ditur ngritjen e komisioneve hetimore parlamentare, ku përfshihen: Komision hetimor për Masakrën Zgjedhore, qe u konfirmua edhe nga raporti i OSBE/ODIHR dhe për humbjen e gjyqit të Becchetit. "Parësore për këtë komision hetimor do të jetë vjedhja e të dhënave private dhe personale të shqiptarëve, keqpërdorimi i aseteve dhe funksioneve publike, abuzimi me fondet e rindërtimit për qëllime elektorale, abuzimi me legalizimet në këmbim të votës. Punësimet e paligjshme në administratën publike dhe blerjen e votës", ka deklaruar Basha.
Komision hetimor për çështjen Becchetti është nisma tjetër e opozitës. "Lufta personale e Edi Ramës me sipërmarrëisn italian do t’u kushtojë qytetarëve më shumë se 120 milionë euro", thuhet sipas burimeve brenda PD-së.
