Një autobus me pasagjerë nga Kosova ka pësuar aksident orët e para të mëngjesit në Salzburg të Austrisë, raporton APA.
Sipas informacioneve fillestare rreth 20 pasagjerë janë lënduar ndërsa nuk raportohet ende për viktima.
Aksidenti ndodhi rreth orës 03:00 në rrugën Salzburg-Nord në zonën e Eugendorf im Flachgau ku autobuzi po shkonte në drejtim të Vjenës.
Zëdhënësi i policisë Hans Wolfgruber deklaroi se: “Në automjet ishin rreth 25 persona. Këta janë turistë që padyshim vijnë nga Kosova” tha ai.
Komandanti i shpëtimit të qarkut Hermann Gerstgraser sqaroi se "Tre persona kanë mbetur të plagosur rëndë dhe 16 të tjerë kanë pësuar lëndime të lehta. Të gjithë u dërguan në spitalin e aksidenteve dhe spitalin shtetëror në Salzburg me ambulanca. Tetë persona që mbetën të padëmtuar aktualisht po kujdesen nga ekipi i ndërhyrjes në krizë në selinë tonë në qytet," tha Gerstgraser.
Ende nuk dihet arsyeja pse ka ndodhur aksidenti.
/rtsh.al/