Në vijim të fushatës elektorale, kryeministri Edi Rama ishte në Skrapar, ku nuk mungoi ironia ndaj Presidentit Ilir Meta. Ai tha se do ngrinte një dolli për shëndetin e Ilir Metës dhe u bëri thirrje qytetarëve ta shpëtojnë që "mos të përfundojnë në çmendinën e Vlorës".
“Këtu nuk na mungon asgjë, përveç bashkimit dhe ecjes përpara. Do doja të flisnim më gjatë, por, sikur të kisha një gotë rakie këtu, do e ngrija një dolli për shëndetin e Ilir Metës, dhe të familjes së tij. Kam ngrënë bukë me ta, nuk dua t’i shoh keq. Dollinë e dytë do e ngrija për votën në 25 prill të Skraparit dhe Vlorës që t’i thonë Ilirit boll tani zbrit nga maja se na turpërove. Unë jam gati të bashkëpunoj me Bashën e PD, me kushtin që të ndahet nga Meta e Berisha, por dua që pas 25 prillit të jem kryeministri i të gjithë shqiptarëve. Do më duhet shumë punë, por është e rëndësishme që ne të bëjmë çmos që politika mos t’i shqetësojë kaq shumë njerëzit, nënat e gjyshet e këtij vendi. Kur u dalin në televizor ajo dyndje burrash që flasin për politikë. Shqipërinë ta bëjmë kampione të Ballkanit në turizëm e kudo, është e mundur. Do kthehem sërish këtu, bashkë me Nasipin, dhe me baba Takun. Sigurisht s’kemi ku shkojmë pa Baba Takun. Me Blendin patjetër, por amanet shokun tim, dhe djalin e vëllain tuaj, Ilir Metën. Është rasti i fundit për ta shpëtuar dhe për ta kthyer nga Vlora në Tiranë dhe për mos e lënë që mos të përfundojë në çmendinën e Vlorës,” tha Rama.
