RTSH 24 Live

Politikë

"Dosja I.M", shkresa Autoritetit për Informimin mbi Dokumentet e ish-Sigurimit të Shtetit: Është Ilir Meta!

27/07/2022

"Dosja I.M", shkresa Autoritetit për Informimin mbi Dokumentet e ish-Sigurimit të Shtetit: Është Ilir Meta!

RTSH zbardh letrën dhe vendimin e Autoritetit për Informimin mbi Dokumentet e ish-Sigurimit të Shtetit, drejtuar gjatë ditës së djeshme kryetares së Kuvendit, Lindita Nikolla. Në këtë shkresë përmendet edhe emri i ish-presidentit, Ilir Meta, ku theksohet se nga verifikimet e figurës nga “Komisioni Mezini” dhe “Bezhani”, ai ka rezultuar i pastër, por nëse institucioni do të ishte në kushtet e riverifikimit, faktet do të ishin ndryshe.

Sipas Autoritetit për Informimin mbi Dokumentet e ish-Sigurimit të Shtetit, ish-presidenti i Ilir Meta përmendet në të paktën 140 faqe informacion në arkivat e ish-Sigurimit të Shtetit.

“Në vijim të kërkesave dhe propozimeve tona të mëparshme, por sidomos duke marrë nxitje nga denoncimi më i fundit i ardhur në institucion mbi pastërtinë e figurës së një prej personaliteteve më të lartë të shtetit, siç është ish-presidentit i Republikës, Ilir Metaj, i pajisur me certifikatë të pastërtisë së figurës nga Komisioni Mezini dhe Bezhani, e konfirmuar nga ana jonë me vendimin e autoritetit nr. 17, datë 28.04. 2017, rezulton se në fakt figuron në dokumentet e krijuara nga strukturat e ish-sigurimit të shtetit. Nëse institucioni do të ishte në kushtet e riverifikimit të pastërtisë së figurës së shtetasit, Ilir Meta, gjë të cilën nuk na e lejon neni 29, pika 4, e ligjit funksional, rezultatet e kërkimit do të ndryshonin’. Ju përcjellim informacionin në lidhje me rastet më flagrantë të konstatuara nga institucioni, ku disa figura të rëndësishme, si A.D, Th.S, S.H, Xh.Sh, D.Ç dhe I.M, të cilat kanë pasur certifikatë të pastërtisë së figurës, figurojnë në dokumentet e krijuara nga ish-sigurimi i shtetit, raste të cilat duhet të mbahen parasysh në vlerësimin tuaj në lidhje me miratimin nga ana e Kuvendit të propozimeve për ndryshime ligjore.’, thuhet në shkresën dërguar Kuvendit.

Autoriteti i Dosjeve ka publikuar në Facebook edhe një dokument, sipas të cilit, Ilir Meta është vendosur në dijeni për këtë çështje. Madje, sipas këtij dokumenti, Metës i është dorëzuar materiali prej 140 faqesh që figuron në dosjet e ish- Sigurimit të Shtetit. Këto vendime, sipas dokumentit të publikuar, janë marrë që në 17 maj të këtij viti.

Zbardhet letra e Autoritetit të informimit/ Në dosjet e Sigurimit

/rtsh.al/