Banorët e Dropullit të Sipërm kultivojnë brez pas brezi jo vetëm ritet fetare për Ditën e Pashkës, por edhe gatimet tradicionale të drekës familjare.
Vezët e ngjyera me lëvozhgat e qepëve të kuqe që ditën e enjte apo supa e magjiricës, që konsumohet në mesnatë fill pas Ngjalljes së Krishtit, janë ndër preokupimet e para të amviseve.
Zonja Aleksandra Loli, mësuese veterane dhe veprimtare shoqërore, jep mendimin e saj për drekën tradicionale të Pashkës në Dropullin e Sipërm.
"Karakteristika kryesore e Dropullit të Sipërm është tepsia e madhe me gërshetën me zorrën e hollë dhe ëmbëlsirat e mbledhura gërshet dhe me trahananë e ëmbël. Në kohët e kaluara përdorej vetëm grurë i zier me sheqer brenda, kurse sot kemi lloj-lloj ëmbëlsirash," shprehet mësuese Loli.
Kurse zonja Natasha Kuco flet për disa nga gatimet që përdoren në ditët e sotme në Dropullin e Sipërm.
"Fillimisht është mishi i qengjit ose kecit, në varësi të zgjedhjeve të secilit, i mbushur me pite tradicionale të zonës sonë, siç janë lakrori me lakra, spinaq. Të gjitha nikoqiret i lyejnë vezët që të enjten e madhe," tregon mësuesja.
Zakonisht, dreka tradicionale e Pashkës konsumohet në familje, por gjatë viteve të fundit në shërbim të banorëve, në këtë ditë të bekuar, janë edhe restorantet apo tavernat e zonës së Dropullit.
Gazetar: Kristaq Xha
/rtsh.al/
